اسلام آباد: عوامی مسلم لیگ کے سربراہ شیخ رشید کے انتخابی دفتر پر فائرنگ سے تین افراد جاں بحق ہوگئے، بھگدڑ سے شیخ رشید کو پاؤں پر معمولی چوٹ آئی۔راولپنڈی کے علاقے خیابان سرسید میں شیخ رشید کے انتخابی دفتر پر مسلح افراد نے اس وقت جدید اسلحہ سے فائرنگ شروع کر دی جب شیخ رشید اپنی انتخابی مہم کے سلسلے میں یہاں آئے ہوئے تھے۔ فائرنگ سے تین افراد جاں بحق ہوگئے جبکہ بھگدڑ کے دوران شیخ رشید کے پاؤں پر معمولی چوٹ آئی۔جاں بحق ہونے والوں میں شہزاد عرف شادا، انوار، جاوید اورایک نامعلوم شخص شامل ہے۔ شیخ رشید احمد کے انتخابی دفتر پر فائرنگ کے بعد ان کے حامیوں کی ایک بڑی تعداد ڈی ایچ کیو کے باہر جمع ہو گئی۔ ان کے حامیوں نے راولپنڈی کے مختلف علاقوں میں احتجاجی مظاہرے کئے اور ٹائر جلائے جس سے کئی شاہراہوں پر گاڑیوں کی آمد و رفت معطل ہو گئی۔ڈسٹرکٹ ہیڈکوارٹراسپتال راولپنڈی کے ایم ایس نے صحافیوں کو بتایا کہ شیخ رشید احمد کو گولی نہیں لگی بلکہ وہ گرنے سے زخمی ہوئے ہیں۔ادھر صدر آصف علی زرداری اور وزیراعظم یوسف رضا گیلانی نے سابق وفاقی وزیر اور عوامی مسلم لیگ کے صدر شیخ رشید احمد کے انتخابی دفتر پر فائرنگ کے واقعے کی پر زور مذمت کی ہے۔ صدر نے متعلقہ حکام سے واقعے کی رپورٹ بھی طلب کر لی ہے۔

راولپنڈی:شیخ رشید پر حملے میں جاں بحق ہونے والے افراد کے ورثا نے لاشوں کا پوسٹ مارٹم کرانے سے انکار کردیا اور لاشیں زبردستی اپنے ساتھ گھر لے گئے۔ راولپنڈی میں سابق وفاقی وزیر شیخ رشید احمد پر حملے کے دوران جاں بحق ہونے والے افراد کے ورثا اور سول اسپتال کی انتظامیہ کے درمیان تنازعہ اس وقت شدت اختیار کر گیا جب ورثا نے لاشوں کا پوسٹ مارٹم کرانے سے انکار کردیا۔ اسپتال کی انتظامیہ کا موقف تھا کہ قانونی کارروائی پوری کرنے کے لیے لاشوں کا پوسٹ مارٹم ضروری ہے جبکہ جاں بحق افراد کے لواحقین کا کہناتھا کہ وہ پوسٹ مارٹم نہیں کرانا چاہتے اور جلد از جلد لاشوں کو گھر لے جانا چاہتے ہیں۔ اس تنازعے کے دوران ہاتھا پائی بھی ہوئی تاہم بعد میں جاں بحق افراد کے ورثا لاشوں کو زبردستی اپنے ساتھ گھر لے گئے

لاس اینجلس:انجہانی پاپ اسٹار مائیکل جیکسن کے ڈاکٹرپر غیر ارادی طور پر قتل کی فرد جرم عائد کردی گئی ہے جس کے بعد آنجہانی گلوکار کے والدین اور مداحوں کی بڑی تعداد عدالت پہنچ گئی۔لاس اینجلس کاؤنٹی ڈسٹرکٹ اٹارنی کے مطابق ڈاکٹر کونارڈ مرے نے مائیکل جیکسن کے قتل کے ذمہ دار ہیں لیکن اس میں ان کی بدنیتی شامل نہیں۔ عدالت میں آنجہانی گلوکار کے ڈاکٹر کے خلاف قتل خطا کے الزام میں میں مقدمے کی سماعت آج سے ہو رہی ہے۔اگر استغاثہ کی جانب سے عائد کیے گئے الزامات ثابت ہوگئے تو ڈاکٹر مرے کو چار سال کی قید ہوسکتی ہے۔ اٹارنی کی جانب سے فرد جرم کے اعلان کے فوری بعد مائیکل کے والد جو جیکسن اور والدہ کیتھرین سمیت خاندان کے افراد لاس اینجلس کورٹ کے باہر پہنچ گئے۔ جہاں میڈیا کے نمائندوں اور آنجہانی پاپ اسٹار کے مداح بڑی تعداد میں جمع تھے جنہوں نے مائیکل کیلئے انصاف پر مبنی بینرز اٹھارکھے تھے۔ ڈاکٹر مرے نے جیکسن کے انتقال سے قبل لاس اینجلس میں پاپ اسٹار کی رہائش گاہ پر انکا علاج کیا تھا۔

لاہور: پاکستان اور بھارت کے درمیان آبی وسائل کے تنازعات پر بات چیت کے لئے بھارتی کمشنر سندھ طاس کی سربراہی میں تین رکنی وفد آج پاکستان پہنچ رہا ہے۔لاہور میں پاکستانی کمشنر سندھ طاس سید جماعت علی شاہ نے بتایا کہ بھارتی کمشنر ارنگا ناتھن اپنے دو مشیروں کے ساتھ چار روزہ دورے کے دوران پاکستان میں دریائے راوی اور ستلج پر واقع بیراجوں بلوکی، سدھنائی،اسلام اور ہیڈ سلیمانکی کا معائنہ کریں گے۔ یہ دونوں دریا معاہدہ سندھ طاس کے تحت بھارت کی ملکیت میں دے دیئے گئے تھے۔پاکستانی کمشنر نے بتایا کہ بھارتی وفد کے دورے کا ایجنڈا صرف مشرقی دریاوٴں کی انسپکشن تک محدود ہے لیکن سائیڈ لائن پر ان سے دریائے جہلم پر تین سو تیس میگاواٹ کے بھارتی منصوبے کشن گنگا اور دیگر متنازعہ امور پر بھی بات چیت کو خارج از امکان قرار نہیں دیا جا سکتا۔ جماعت علی شاہ کا کہنا تھا کہ پاکستان اس دورے کے جواب میں مقبوضہ کشمیر میں دریائے سندھ پر بھارتی منصوبوں کی انسپکشن کا مطالبہ دہرائے گا۔ بھارتی وفد دس فروری کو واپس دلی روانہ ہوگا۔

کراچی: گیارہویں ساوٴتھ ایشین گیمز میں بھارت کو شکست دے کر طلائی تمغہ جیتنے والی پاکستان وائٹس ہاکی اور ہینڈبال کی ٹیمیں وطن واپس پہنچ گئیں۔ سیف گیمز میں عمدہ کارکردگی پیش کرنے کے بعد قومی کھلاڑی کراچی کے جناح انٹرنیشنل ائیرپورٹ پہنچے تو لاوٴنج میں موجود پی ایچ ایف اور ہینڈبال ٹیم کے عہدرارن ، اہل خانہ اور شائقین نے انہیں ہار پہنائے اورپھولوں کی پتیاں نچھاور کیں۔ ہینڈ بال اور ہاکی ایونٹ کے فائنل میں پاکستانی ٹیم نے روایتی حریف بھارت کو شکست دے کر طلائی تمغہ حاصل کیا تھا۔ ہاکی اور ہینڈ بال کی ٹیم کے ساتھ سیف گیمز میں حصہ لینے والی گالف، شوٹنگ اور باسکٹ بال کی ٹیموں کے کھلاڑی بھی وطن واپس پہنچ گئے۔اس موقعے پر پاکستان وائٹس ہاکی ٹیم کے کوچ شہباز جونیئر نے کہا کہ وہ ٹیم کی پرفارمنس سے پوری طرح مطمئن ہیں۔ ان کا کہنا تھا کہ ایونٹ میں شاندار کارکردگی کا کریڈٹ پاکستان ہاکی فیڈریشن اور پی ایچ ایف کے صدر قاسم ضیا کو جاتا ہے۔ انہوں نے کہا کہ کھلاڑیوں نے متحد ہوکر فائنل میں بھارت کے خلاف کامیابی حاصل کرتے ہوئے گولڈ میڈل اپنے نام کیا۔

اسلام آباد: اسلام آباد میں طنز و مزاح کے صاحب اسلوب شاعر سرفراز شاہد کے لئے شام پزیرائی منعقد کی گئی۔ تقریب کا اہتمام بزم اکبر الہ آبادی اور مقتدرہ قومی زبان نے کیا۔ ممتاز مزاح گو شاعر انور مسعود اور انعام الحق جاوید نے کہا کہ سرفراز شاہد نے قدروں کی بے قدری، معاشرتی ناہمواریوں اور تہذیب کی پامالی کا نوحہ لکھا ہے، اس کے کلام میں موجودہ دور کی سائنسی پیش رفت بھرپور طور پر سانس لے رہی ہے۔افتخار عارف، میاں نزیر اظہر، ڈاکٹر توصیف تبسم، منشایاد، ڈاکٹر سعید اقبال سعدی، فرزانہ جاناں اور عائشہ مسعود ملک نے سرفراز شاہد کی خدمات کا اعتراف کرتے ہوئے کہا کہ سرفراز شاہد مزاح نگاری کا کام سنجیدگی سے کر رہے ہیں۔ انہوں نے طنزیہ فکر اور مزاحیہ انداز بیاں سے ایج کے معاشرے کی عکاسی کی ہے۔۔ صاحبِ شام سرفراز شاہد نے موجودہ حالات کے تناظر میں اپنے تازہ قطعات سنا کر سامعین کو محظوظ کیا۔۔۔ مقررین نے کہا کہ سرفراز شاہد نے اپنی شاعری میں شگفتگی کے ساتھ شائستگی کو بھی برقرار رکھا ہے اور ہنسنے ہنسانے کے علاوہ اصلاح کی کوشش بھی کی ہے۔