شام میں ترک سرحد کے قریب بمباری سے 28 افراد جاں بحق

دمشق: شام میں ملکی و غیرملکی افواج کے فضائی حملوں میں 4 بچوں سمیت 28 افراد جاں بحق ہوگئے۔
امدادی کارکنوں نے بتایا کہ صوبہ ادلب میں ترک سرحد سے قریب واقع گاؤں ارماناز پر شامی و روسی ائر فورسز نے بمباری کی اور مختلف اہداف کو نشانہ بنایا جس کے نتیجے میں 4 بچوں سمیت 28 افراد جاں بحق اور متعدد زخمی ہوگئے۔
دوسری جانب روسی افواج نے عام شہریوں کو قتل کرنے کی تردید کرتے ہوئے کہا ہے کہ انہوں نے صرف عسکریت پسندوں کے ٹھکانوں کو نشانہ بنایا ہے۔ رواں ہفتے ترک حکومت نے بھی کہا تھا کہ روسی افواج ادلب پر بمباری کرکے عام شہریوں کو ہلاک کررہی ہیں جو سیز فائر معاہدے کی کھلی خلاف ورزی ہے۔
10 روز قبل شامی باغیوں نے ملک کے شمال مغرب میں سرکاری فوج کے زیر کنٹرول علاقوں پر حملے بھی شروع کیے ہیں۔ یاد رہے کہ ترکی، ایران اور روس نے حال ہی میں ادلب میں جنگ بندی زونز پر اتفاق کیا تھا جس کے تحت ترکی ادلب میں اپنی فوج بھی بھیجے گا۔ ادلب میں کئی علاقوں میں النصرہ فرنٹ کا کنٹرول ہے اور 6 ماہ تک وہاں قدرے جنگ بندی کی صورتحال رہی تاہم اب دوبارہ سے جھڑپوں میں تیزی آگئی ہے۔

اپنا تبصرہ بھیجیں

This site uses Akismet to reduce spam. Learn how your comment data is processed.